POESIE

Titolo: È inutile che faccio sempe bbene!
Data Inserimento: 17/7/2023 alle ore : 13:2

Giranno ‘a iere dinte ‘o Campusanto,
guardanno a’ uno a’ uno ‘sti ritratte
spontanea me facietto ‘na domanda:
Pecchè quann’ uno mòre, …all’improvviso,
‘o saglieno diritto ‘n Paraviso?

Ij chesta cosa nun me ‘a spiego ancora.
Chiunque mòre - è bbuono o ‘è fetente,
oppure nun se sape ‘a do’ ne vène -
appena trase dinte ‘o Campusanto
ognuno ‘o tratta manco fosse Santo!

Pecchè? …Se è sempe stato ‘nu fetente,
- e chisto fatto ‘o sanno tutt’ quante –
chiunque passe… quase s’addenocchia,
…se vàse ‘stu ritratto lla vicìno,
se fa ‘a croce e po’ pure l’inchino?

Allora ij penzo e dico ‘a tanto tiempo:
È inutile che faccio sempe bbene!
Ormaje nun serve a niente…, è tiempo perzo…!
Quanne uno mòre, …chesto è assicurato:
Ognuno scorda ‘o mmale do passato!

Ce vo riguardo - chesto si l’ammetto! -
Nun ddico do trattà co’ indifferenza...,
…‘e certo ce vo un poco di rispetto,
pecchè ‘o muorto è sempe ‘nu dulore…,
ma chesto, certo, nunn ‘o fa Priore!

Titolo: A’ ‘razzia
Data Inserimento: 17/7/2023 alle ore : 13:0

Ij te ‘uardavo…!
Si Marunnella mia ij te ‘uardavo,
e senza dirte manco ‘na parola,
co’ chisto core mij,
…ij te parlavo.
Ij te parlavo
e chisto còre mij t’addimannava
se tanta ‘razzia se putesse avè,
e senza fa’ capì…
tu me sentive.
Tu me sentive, si…!
Tu me sentive!
Pure se stèvo ‘mmiezzo a tanta ggente,
che co’ preghiere e cant’ te cercava,
Tu mmiezzo a tanta folla me sentive!
Ij te priavo!
Mammella Santa mij…ij te priavo!
Mentre ‘a chist’uocchie lacrime scennevano,
comm’ a funtane senza se fermà,
…senza te fa’ vedè tu me parlaste.
Tu me parlaste,
pecchè ‘stu core ‘n pietto te sentette!
…Pecchè ‘sta razzia ‘o vero me l’he fatta!
Maronna Santa mij,
mamma de’ mamme,
…mo chiagno ‘e ggioia e prego tutt’ ‘e juorne
pe’ chesta grand’ razzia ch’haggio avuto.
Tu mmiezzo a tanta ggente me sentuto…
Tu miezzo a tanta lacrime ‘e capite
che chisto còre mij era sincero!
Grazzie Maronna mij,
mamma de’ mamme!
Ij chesta ‘razzia nun me ‘a scordo maje!

Titolo: Ij scrìvo pe’ tte…
Data Inserimento: 17/7/2023 alle ore : 12:59

Ij scrìv’…, scrìvo sempe
mettennece armunìa.
Scrìvo paròle doce
chiammate: Poesìa.

Scrìvo cummedie allere,
…canzone appassionate,
…m’apparto sulitario
perdennece ‘e nuttate.

Ij scrìv…’, scrìvo sempe
si staje… o’nunn’ ce staje...
Scrìvo pe’ tte rumanze
e nun me stanco maje.

Scrìvo pe’ tte muntagne
‘e lettere d’ammore
e, appassiunatamente,
ce metto tutt’ ‘o còre.

Ij scrìv’, scrìvo sempe
…me ‘o ssento ‘a dinto ‘e vvene,
e scrivarraggio sempe
pecchè te voglio bbene!

Scrìvo fin quanno mòro,
e scrìvo saje pecchè?
Pecchè ij quanno scrìvo…
stong’ penzanne a te!

Titolo: Vinticinc’anne ‘n zieme
Data Inserimento: 17/7/2023 alle ore : 12:58

(Per i miei 25 anni di matrimonio)

Ij te ‘ncuntraje
e senza ce penzà…
ij me fermaje.
Ij te ‘uardaje
e dinte a niente me n’ ‘nnammuraje.
Ij te parlaje,
comme se parla comme parla ‘o core,
e tu, scurnosa ‘e me,
nun dispunnive.
Tu me ‘uardave
e chisto core mij nun s’arrenneva;
allora saje che fuje?
Tra chiacchere e prumesse
ij t’abbracciaje,
e chesta vòce mij cchiù me tremmava.
Tu m’astrigniste
e’ij te diciette: Me so ‘nnammurato!
Allora ancora ‘e cchiù ij te vulevo…
Ij te vulevo ‘a mij pe’ tutt’ ‘a vita,
e dinte a niente allora…
ij te spusaje.
‘A chillo juorne n’ hammo fatto ‘e stada!
Vinticinc’anne già se ne so’ ghiute.
Quant’anne so’ passate…, quanta gioie….
Quanta mumente belle appassionate…
Quanta felicità ch’avimmo avuto!
Ij te spusaje
e song’ stato ‘o vero furtunato!
Ij mo te guardo
e song’ sempe, ‘e te, cchiù ‘nnammurato.
Ij te giuraje,
pe’ ssempe, eternamente,
ij te giuraje,
che t’hero ‘a fa’ felice tutt’ ‘a vita
e ‘sta prumessa nun me ‘a scordo maje!

Titolo: Veglio pe’ te
Data Inserimento: 17/7/2023 alle ore : 12:57

È notte chiena e’ ij nun dormo ancora
pecchè, ‘ncantato, stongo a te guardà.
Te fisso ‘mbriacato ‘a chist’ammore
e doce, doce te stregno ‘inte ‘e mmane.

Tu duorme ammore mio ma ij nun reposo.
Chist’uocchie nun furnesceno ‘e guardà
chiste capille tuoje avvellutate
e ‘stu mussillo russo culurato.

Passano l‘ore, passano ‘e minute
e nun se sente manco ‘nu rummone!
Niente se mòve…, manco l’onna ‘e mare
che a vierno sbatte forte ‘n faccia ‘e scoglie.

Dormeno tutt’ ma… che vuo’ durmìre!
Dorme ‘sta luna ‘n cielo dinte ‘o scuro.
Dormono pure ‘e rrose ‘inte ‘o ciardino.
…Sulo ‘stu core mio mun vo durmì!

Ce sta silenzio ma sto ‘n cumpagnia
pecchè ‘e ‘stu core mij ne sento “ ‘a voce”!
…‘O sento comme sbatte ‘e passione
pe’ chist’ammore che mo m’appartene.

Nun te scetà ja’ duorme a suonne chino.
…Veglio ij pe’ te, …veglio ij ‘nfino a dimane,
e quanno schiara juorne, te prumetto…:
A bòtta ‘e vase ij vengo a te scetà!