POESIE

Titolo: ‘O cane
Data Inserimento: 14/7/2023 alle ore : 9:46

Pòvero cane spierzo ‘inte ‘o rione
‘nnante e a rreto vaje facenne ‘e corze
pecchè te mise ‘n capo ‘e darme a muorze;
…me staje facenno, ‘o vero, ‘mpressione!

Abbaje forte assaje co’ tutte ‘e forze.
…Si tuosto e nun vuò sentere raggione;
…Capisco ca te mancarrà ‘o patrone;
…tu staje nervuso e’ ij vaco pe’ “ttorze”!

N’o vvì ca ormaje te si fatte gruosso!
Ja’, fatte furbo, tieneme p’ amico
ca ogni tanto t’arrialo ‘nu osso.

Stamme a senti mò chello ca te dico:
Attierrelo chest’ odio ‘inte a’ ‘nu fuosso,
…famme passa cuieto ‘inte a ‘sto vico.

Titolo: Fuoco ardente
Data Inserimento: 14/7/2023 alle ore : 9:44

Doce, doce stò sbircianne …,
…stò guardanne ‘n funne ‘o core
mò che ij te stò abbraccianne
e te stongo danne ammore.

Ce hagge viste, sulamente,
‘na vampata ‘e fuoco ardente
e mo manco ‘nu pumpiero
po’ stutà chisto vraciero.

‘Nu rimmedio stò cercanno
pe’ vedè comm’ ‘e frenà
chesti vocche ca se stanno…,
inte ‘o mmele, a ‘mbruscenà.

Co’ ‘sti vàse ca me dato
tutt’ cosa s’è appicciato
e ‘stu core ‘nnammurato,
‘nzieme ‘o tuojo, s’è squagliato.

Stanne azzicche e nun se scolla
‘sta catena arravugliata;
…chist’ammore ormaje nun molla,
…pure ‘a chiave s’è squagliata.

Nun putimmo, veramente,
fa stutà ‘sto ffuoco ardente;
…sulo ‘o tiempo ce ‘o ppò fa’
doce, doce cunzumà.

Titolo: ‘A morte
Data Inserimento: 14/7/2023 alle ore : 9:43

Se ‘a morte mò venesse
e pigliarme me vulesse
io ‘nu patte le facesse
e’ accussì po’ le dicesse:

Se ll’ammore nun tuccasse
ij te dico: Nun muresse!
…Vuò sapè comme facesse?
…Ce vuò mettere ‘a scummessa?

A muglierema vasassse;
po’ cu ‘e ffiglie m’astrignesse
e tu tanne me pigliasse
quanno ‘ammore se fernesse.

Ma do tiempo che passasse
e ll’ammore ca le desse,
chiest’ è eterno …me dicisse…
pure ‘a morte ‘e fàtto fesso!!

Titolo: L’arte do lamiento
Data Inserimento: 14/7/2023 alle ore : 9:41

Dduje viecchie dinte a’ cchiesa ll’ata sera,
guardanne fisso a Ccristo mise ‘n ccroce,
invece ‘e stà ‘mbicciate co’ ‘e preghiere,
facevano cummiente sottovoce.

Ij ca sentette, quase, tutte cose
nun me ‘a teniette, e subbeto diciette:
‘Uardate ca ‘e sicuro ve sbagliate…;
ca ‘o Signore, no, nun fa dispiette!

È inutile ‘stà storia ca dicite…
…cercate cchiù do ghiusto do Signore.
Vuje nun v’accuntentate da salute
‘e chille ca purtate dinte ‘o core.

Penzate sulo a vvuje e nun è ggiusto!
Vuje nun pigliate ‘a vita a comme vene.
Avite chiesto a Ccristo sule ‘o vvuosto
e n’ haggio ‘ntiso ‘na parola ‘e bbene.

Eppure site viecchie e nun v’abbàsta
‘e tennere ‘a salute e sempe sazzie.
Iàte cercanne, sempe, cchiu do ghiuste
e maje a Ccristo avite ditto: Grazzie.

‘N coppa a ‘stu fatto allora haggio capito
ca dinte ‘o core niente c’è rimasto;
…ognu’uno se lamenta do supierchie!
Pe’ llarte do lamiento… ognuno è mmasto.

Titolo: L’anniversario
Data Inserimento: 14/7/2023 alle ore : 9:31

(per i cinquant’anni di matrimonio dei miei genitori)

Faciteve guardà ‘e ‘sti ghiurnate
‘nfunno a ‘stu core vuoste che purtate;
…ce veco ancora duje ‘nnammurate
sperute ‘e se cercà ll’uno co’ ll’ate;
…vugliuse ‘e se tenè sempe abbracciate.

Faciteve sentì che ve chiammate;
comme succed’ quanno se vò bbene.
Vurria fa’ vedè che ve cercate
e comme scorre forte dinte ‘e vvene
‘st’ammore ca ve tene ‘ncatenate.

Facitece capì vuje che sunnate
se… nun è ammore chiste ca pruvate.
So’ cinquant’anne ca v’atturniate
‘e tanta ggente che v’ha sempe amate
e nunn’ è ppoco chell’ ca ce date.

Facitece ‘mpazzì pe’ chisto ammore.
Facitece ‘mparà, mò, comme a vvuje
‘e purtà annanze ‘a vita co’ calòre
‘e chi ‘a sempe date tutt’a nuje
e’ a’ ogni ccosa ce ammiscato ‘o core.