POESIE

Titolo: Duetto: Lassammece
Data Inserimento: 13/7/2023 alle ore : 12:41

LEI:
Ca me chiammato a fa’…, lassame perdere!
…Chiudimmela stà storia fatta ‘e niente!
…Lassammece ‘sta sera pe’ telefono
…stammo perdenno tiempo inutilmente!

Tanto ‘sta storia è stata tutta inutile!
Ognuno ‘e nuje tene ‘na famiglia…
È stato sulamente passatiempo….
Restamme ognuno a’ casa ‘nzieme ‘e figlie!

LUI:
No nunn te credo…, tu nunn si sincera…
…Nunn è ‘o core tuoje che ‘a parlato!
Tu me dicive nunn te lasso maje…
…Ij songo stato ‘o primmo ‘nnammurato.

Nun te ‘mpurtava ‘e chi tiene vicino…
Tu ‘nfino a’ iere ssera me ggiurato,
quanne ‘inte a ‘sti bracce me stive astrignuta:
“St’ammore è grande… t’haggio sempe amato!”.

LEI:
Mò ‘e chisto tradimento so’ pentita!
Tutt’ era ‘o vero… mò tutt’ è cagnato!
Chillo figlio mij, buono malato,
turnanne a casa ‘a iere haggio truvato!

Allora annanze a Ddio haggio giurato
che si ‘sta grossa razia avesse avuto,
pure se me ne moro pe’ st’ammore…,
‘e te lassa ij ce facevo ‘o vuto!

LUI:
‘O ssaje, ammore mij, chello ca provo…
ma co’ stu fatto che me raccuntato
…l’ammore ‘e mamma è sempe cchiu putente
e vale cchiù do bbene che me dato,

e maje vurria ca prumesse a Ddio,
fatte pe’ figlie, comm’ e fatto tu,
nun fosse mantenuta pe’ ‘st’ ammore!
…Ij da stasera nun te chiammo cchiù!

Titolo: 'A maesta de' maeste
Data Inserimento: 13/7/2023 alle ore : 12:39

(ad una bravissima insegnante)

'A maesta de' maeste
se ne ghiuta 'n penzione,
'a fernuta de' 'lluccà
a 'sti ppovere gualione.
…'E teneve a tutt' quante
sempe sotto pressione,
cu 'nu metodo priciso:
Cu 'a"carota" e co' "bbastone";
…‘o ffaceve pe' 'mparà,
chesto è fòra discussione!
A' ognuno 'o cumannave…,
ma cu tanta educazione.
...'Nu carattere pussente
Ma… 'na vera cumpagnona;
…sempe pronta a da' 'na mano
senza fa' distinzione...
Da’ bravura ca teneve
- nun ce stanno paragone -
'e vuleve troppo bbene…
nun faceve eccezione…
…Me pareve 'na gazzella
ma cu 'a forza 'e 'nu lione.
‘A maesta de' maeste
ce ha lasciato n’emozione…
…era ‘o vero troppo brava
Ma… è ghiuta ‘n penzione.

Titolo: ‘N cielo vogl' scrìvere
Data Inserimento: 13/7/2023 alle ore : 12:38

Fissanno 'o splennore 'e 'stu tramonto
m' ammiro comme 'o sole se ne trase
e lassa 'o posto a' luna ‘inte a' nuttata.
Tutt' se cagne e pare 'o munno argiento
guardanno a te che appare 'nnanze a 'st' uocchie
comme 'na stella che risplenne 'n cielo.
M’abbaglia chesta luce toja lucente
mentre ‘ncantato guardo ‘stu splennore
e ‘mpruvvisamente se ‘nzamato ‘o core.
…Me sento, dinte a niente, ‘nu pueta
che, co’ pparole asciute ‘a dinte ‘o core
stess’ a cantà pe’ ore e ore sane
sùlo pe’ fa’ sentì chello ca provo.
Po’ senza ce penzà, senza timore
‘sta sera, mmiezzo a chisto manto ‘e stelle,
vulesse putè scrivere ‘inte ‘o cielo
quando so’ troppo ‘nnammurato ‘e te!

Titolo: Nun dormo
Data Inserimento: 13/7/2023 alle ore : 12:34

È notte chiena e ancora nun reposo!
Nemmeno ‘na vucella cchiù se sente
'inte a ‘sta notte triste e scunzulata.
Nun tengo cumpagnia, stongo sulo,
eppure tengo suonno ma nun dormo
pecchè ‘stu core nun me fa durmì.
Ma nun 'o fa p'ammore chesto no!
A me l'ammore nun me manco certo!
Me vonno bbene e chesto 'o core 'o ssape
comm’ij ‘e voglio bbene a tutt’quante!
Forse sarrà pe' chesto che se 'nzarma!
…M'avvisa quanno stongo assaje felice
e cerca chiano, chiano e me calmà.
All'impruvviso sbatte comm'a che!
Credenne 'e fa paura, . . . ‘e fa tremmà!
Ma isso ‘o ssape… senza ca se sbatte…
…ce l’haggio ditto: Nun te sbalastrà!
…A me ‘na vita eterna nun me serve!
…Pure se è cchiù corta nun me ‘mporta…
…Me bbasta ca me stanno tutt’ attuorno
e ca… fernesce co’ serenità!

Titolo: Mamma mia
Data Inserimento: 13/7/2023 alle ore : 12:32

Mamma mia, mamma mia
‘a jurnata passa allera,
da matina nfin’ a sera,
quanno stongo a penzà a te!

Mamma mia, te penzo sempe
e a vvòte penzo a quanno,
…quanta vote dint’ a n’anno,
ce vedimmo oppure no!

Mamma mia, mamma cara
chi te cerca è chisto figlio
pe’ capì, pe’ nu cunsiglio,
…quanno è ghiusto e quanno no!

Mamma mia, mamma mia
ij te voglio bbene assaje,
…chesto nun te ‘o scurdà maje:
…Prego a Dio penzanno a te!