POESIE

Titolo: 'Sta luce si tu
Data Inserimento: 18/7/2023 alle ore : 11:19

Nun dormo, io veglio
…sto sempe scetato;
…sto sempe, ogni notte,
cu ll'uocchie sbarrate!

Io fisso e po' scruto
pe' ddinte 'a ddò me;
...sta luce 'a do' vène
io vulesse sapè.

M' ggiro e m'avòto,
...sto comm' a' 'nu pazzo,
...me sòso e po' vàco
pe' ffore 'o terrazzo!

Me torno... e me cocco
...vulesse durmì!
Ma comme haggio 'a fa'…
ij vulesse capì!

M'abbaglia, m'acceca,
me sbianca 'e llenzole
…'sta luce ca vèco
è chiù forte do sole!

'Sta luce ca vèco
'utte 'e notte 'inte 'o scuro,
mò ll'haggio capito...:
Si tu... so' sicuro!

Titolo: 'O virus
Data Inserimento: 18/7/2023 alle ore : 11:18

Sto tremmanno, …stongo muscio!
Me scunocchio dint' 'e ccosce!
Tengo 'a freva e pure 'a tosse;
…vuò verè... teng' 'o virus!?
Teng' 'a faccia comm' 'a cera.
‘O vvì lloco mò succer'...!!
'Sta paura mò me fotte!
...Ij me sto facenno sotto!
Me credite? sto tremmanne!
…Penzo già che sto murenno.
Me so' miso annanze 'o specchio
e già vèco 'utt' pellecchie.
Cu 'sta faccia rossa, rossa
già me vèco dinte 'a fossa!
'O ssapevo ca 'o pigliavo...
troppo bello se 'o scanzavo...
Ij già stongo miso 'n croce,
…m'ha acchiappato doce, doce!
Ce mancava mò sul' isso...
'sto sfaccimm' ro virus!

Titolo: ‘Stu core mij
Data Inserimento: 18/7/2023 alle ore : 11:17

“'Uagliò” tu vuò pazzia?!
Nun truove cchiù ricietto!
Nun saje cchiù ca vuò fa'!
Te miso a fa' 'o rispietto?!

All'imruvviso saglie…
e doppe poco avasce;
ma quanto si canaglie,
ma… aspetto ca t'ammusce.

Tu "zumpe", me minacce!
…Me pare 'nu cardillo
...repuosate pagliacce!
Furnisce 'e fa' 'o “strunzillo”!

Nun vide che l'amice,
'mmiscate cu 'e pariente,
a me dimanne e ddice:
'Uagliò ma è cosa 'e niente?

Dancella tu 'a risposta!
Io nun ce 'o saccio di...
Dille che 'o faje apposta
e nun 'a vuò fernì!

Dincelle a' uno a' uno,
…chiunque me 'o dimanne,
ca io nun so' nisciuno
...si tu che 'a cumanne!

Titolo: Papà
Data Inserimento: 18/7/2023 alle ore : 11:15

(da mia moglie per il suo papà)

Papà,
tu che nunn’ me fatto maje 'na carezza,
pecchè dicive, cu 'sta "capa tosta":
"Pe' mme 'e figlie se vàsano 'n zuonno",
mo ca te vèco sulo dinte 'e suonne,
te cerco nu favore gruosso assaje,
pecchè me sento triste chesta sera:
Fammillo 'nu carizzo piccirillo!
Famme 'o senti 'o calore 'e chesti mmane!
Sfiorala 'sta faccia pe' 'na vòta!
Dammillo 'nu vasillo azzicco, azzicco!
Famme 'o sentì cu 'e vàse 'o ciato tuojo,
'stanotte mentre dormo a suonne chino!
Abbracciame cchhiù fforte che può fa'!
Famme sentì, almeno pe' 'na vota,
chello ca se prova dinte 'o core
quanno 'nu pàte te tène astrignuto.
Famme ‘a passa, stasera, ‘sta tristezza!
Famme scetà cu 'e llacrime 'e 'sta gioia,
e chiagnere ‘na vòta 'e cuntentezza.

Titolo: Ij so’ scurnuso
Data Inserimento: 18/7/2023 alle ore : 11:3

Comme sì ddoce quanno passe e spasse
pe’ ‘nnanze a me co’ chillo pizzo a rrìso,
…te vèco e già me sento ‘n Paraviso.

‘Nzerranno ll’uocchie sonno e po’ me dico:
A muorze te ‘o magnasse ‘stu mussillo
se sulo te vasasse ‘nu zechillo.

Invece è ‘n anno ca t’ammiro sulo,
da ‘reto ‘o vìco, stanneme annascuso,
comme a’ ‘nu fesso, pecchè so’ scurnuso.

Ma… m’haggiò ‘a fa’ ‘na panza ‘e vàse tuoje
se a me ‘mpruvvisamente passa ‘o scuorno
e a tè t’ ‘ncontro ancora pe’ ccà tuorno!