POESIE

Titolo: ‘I spùse
Data Inserimento: 14/7/2023 alle ore : 10:11

Vestuti ‘a spùse ogge v’haggio visto
e so’ rimasto muto a ve guardà!
Cerco ‘e pparole ma nun dico niente
pe’ tanta emozione ca me fa.

‘Sta mano trema comme a’ foglie ‘o viento
e appena ve riesco a v’ abbraccia!
Vulesse dì… stigniteme cchiù fforte!
Ma nun me jesce ‘a voce pe’ parlà.

‘Na lacrima me scenne lentamente
mentre ‘ncantato stongo a ve fissà.
Pare ca ‘nterra nun tocco cu ‘e piere,
…sta’ contentezza a mme me fa vulà!

‘Nnanze all’altare state addunucchiate
e ‘na prumessa, a Ddio, le state a ffa’.
L’Avemmaria sona sottovoce
e core a core state a ve spusà.

Ve voglio allora dì bbona furtuna,
co’ tutt’ ‘o bbene ca ve pozzo dà!
…Vulesse ‘o vero darve pure ‘o core
pecchè chi vò sta’ a di’ …chisto è papà!

Titolo: Duje viecchie
Data Inserimento: 14/7/2023 alle ore : 10:8

Saje ca stò penzanne Nanninè?
‘E tiempe bbelle 'e tanto tiempo fa;
quanno currevo subbeto 'inte ‘o lietto
co' chella smania ‘e te vulè vasà.

Io te dicevo: Strigneme cchiù fforte!
E tu llà sempe pronta a te scanzà;
…pareva maje tu tenive voglia
e maje ‘nu vase me venive a da'.

Quas’ 'e cuntave ‘stì carizze toje.
Maje 'na vota è prevenuto ‘a te…
…Io te cercavo e tu te ne fuive…
…parèva nu favore fatto a me!

Mo pure vengo, a vvote a’ t'abbraccià,
ma ormaje ovvì… ce simme fatte viecchie…!
…Nun me ne manne cchiù comme 'na vota
ma… se vàco a tentà tocco ‘e pellecchie!

Allora penzo e te vulesse dì:
‘E visto ca 'o lassato s'è perduto!?
Nunn' era meglio ca m' accuntentave…!?
…Chello che hammo perzo s'è fernuto!

Titolo: Co’ 'nu carizzo
Data Inserimento: 14/7/2023 alle ore : 10:7

Quanno torno a' casa 'a sèra
e 'a jurnata è ghiuta storta
ij me sento 'utte nervuso,
…traso già sbattenne 'a porta.

Stongo tutto smaniuso
…votto 'a giacca addo va, va!
…A nisciuno guardo 'nfaccia
e’accummencio a sbraità!

Cerco “'o pilo 'a dinte all'uovo”
pe' cercà d'accummincià!
…Pure 'o cane se ne fuje;
…dinte a' cuccia se ne va….

Se m'abbocco po' m'aiazo,
…proprio nun me firo 'e stà!
…Manco a ttavula m'assetto
quanno è pronto pe' magnà!

Nanninella m'addimanne,
…ch'è succieso vò sapè,
ma ij nunn ‘a donco retta
e allucco comm' a cche.

Pure 'a ggente do quartiere
trase dinte a dimannà…,
…uno trase e' 'n ato iesce…
…cerca 'e nunn me fa' alluccà!

Ma nepoteme s'accosta
…sape 'o modo ‘e me fermà!
…Primma stregne e po' me vàse
e' ij torno a me calmà.

Faccio 'o ‘nzisto, si l'ammetto,
…nunn me pozzo suppurtà…
ma m'abbasta 'nu carizzo...
pe’ turnarme a’ ‘ccuità!

Titolo: ‘E sfugliatelle
Data Inserimento: 14/7/2023 alle ore : 10:6

So’ ddoje sore: ‘A riccia e ‘a frolla,
…dinte ‘e bbar fanno ’a folla.
Chella riccia è disarmante,
…veste d’oro ed è cruccante,
…è pe’ ccerto ‘a cchiù amata,
…bbella, doce e prufumata.

L’hata, ‘a frolla, … è ‘na pupata
…iesce sempe priparata;
…è cchiù tonna, e cchiù mudesta;
…quanne ‘a guard’ è già ‘na festa!
…Quanno ‘a sento… faccio ‘e ccorze,
…m’ ‘a vulesse magnà a muorze!

Nunn’ ‘a ‘ncontro maje sola…,
…dinte ‘o bbar fore ‘a scòla.
‘N cumpagnia ne va fiera
…iesce sempe cu ‘a guantiera.
…Se me desse ‘na sperànza…
…me ‘a vuttasse dinte ‘a panza!

So’ ffucose, so’ vullente…
e ognuno ‘e ttene mente!
…Stanno a’ reto a’ ‘nu bbancone…;
…songhe ‘o vero troppe “Bbone”…!
Vaco ‘o bbar ‘utt’ ‘e mmatine
pe’ tenerle cchiù vicine...

Cheste a Napule so’ nnàte
ma ognuno s’ha rubbate!
…De’ bellizze 'e 'stu paese
sanno tutt' farce 'e spese!
Songhe ‘o vero troppe bbelle
chesti ddoje sfugliatelle!

Titolo: Pe’ nepotema Marì
Data Inserimento: 14/7/2023 alle ore : 10:6

È pe’ essa ‘stu sunetto,
…pe’ nepotema Marì,
che pe’ ‘a capa ‘ncoppa ‘e libbre
s’è ‘mparato Oncologì.

Essa sàpe tutto cosa…!
…S’ha pigliato ‘o Dottorato!
…È ‘a meglio ‘e tutt’ quante…
…chella ‘a sèmpe sturiato.

Ij ve ‘o ddico, onestamente,
…no pecchè mò song’ ‘o zì,
…è capace ‘o veramente...!

Chella se ne sape ascì…
…È ‘a chiù bbrava de’sturente
e ve ‘o pozzo garantì!