POESIE

Titolo: ‘Ncoppe a’ ‘na tuvaglia ‘e pizzo
Data Inserimento: 13/7/2023 alle ore : 13:7

Io durmevo ‘n pizzo ‘n pizzo
a’ ‘nu scuoglio fatt’ a… pizzo,
…‘ncoppe a’ ‘na tuvaglia ‘e pizzo,
…tutt’annuro… ca friscezza.

Quanne… ‘n onna cacacazza
sbatte ‘nfaccia ‘o scoglio a… pizzo
e cadenne a sghizzo, a sghizzo,
…và, e me ‘nfonna tutt’ ‘o mazzo.

Rimaniette comme ‘o turzo.
Ij penzaie: “Che carizzo
ch’ haggio avuto …ca bellizze”.
…Me sentiette in imbarazzo.

‘A guagliona, ‘e renza, ‘e renza,
se scustaie co’ ‘a risa ‘n pizzo
da’ tuvaglia fatta ‘e pizzo,
…tutta ‘nfosa ‘e panza ‘e zizze.

Pe’ nun perdere ‘a pacienza
me spustaie do’ scuoglio a… pizzo,
…ce ne iettemo ‘mbaranza
‘nterra ’a rena, mise ‘e panza.

Ma nat’onna caccia ‘a scienza
vuttanne acqua in abbundanza
tutta n’faccia e ncoppe ‘a panza.
Le diciette co’ crianza:

Iammungenne ca me stizzo!
Primma ca mò iesco pazzo…
“Aiazza ‘stà tuvaglia ‘e pizzo
che già m’haggio rutt’ ‘o cazzo”!

Titolo: ‘Na mela ‘o juorne…
Data Inserimento: 13/7/2023 alle ore : 13:5

'Nu pruverbio antico dice
che se vuò campa felice
cu 'na mela fresca 'o juorno
lieve 'o miereco ra tuorno.

Ma chisà chi l'ha 'nventata
‘sta grandissima strunzata!!
Nunn' è meglio ca me magno
'nu spavetto o' 'na lasagna?

Nunn è meglio 'nu risotto
'nzieme a quatte panzarotte?
Dice si ma po' fa male...
te fa correre 'o 'spitale.

Si ma è cca che vene 'o bbell'...
che me danno 'na melella,
pure mezza 'nfracetata,
e già m'hanno accuntentato.

E si doppe me lamento...
diceno: ij no, nun saccio niente,
fatte 'o ddì pure all'amice…
…è 'o pruverbio ca t'ho ddice…!

Titolo: Me ne vogl' íj luntano…
Data Inserimento: 13/7/2023 alle ore : 13:3

Me ne vogl' jí luntano,
proprio luntano assaje!
Me ne vogl'íj ‘a ddó maje
putesse cchiù turnà!

Me voglio scurdá 'e tutto,
…tutt’ ‘e turmiente amare
che chi tenèvo care
me ha fatto suppurtà!

Nun voglio cchiù nutizie
d'amice e de’ pariente!
Nun voglio sapé niente
'e chello ca se fa...!

Senza lassà nutizie
me ne vogl’ij sulagne
giranno pe’ muntagne
pe’ n’è putè ‘ncuntrà!

Me n’haggio fuij sulo
currenno mmiezzo ‘o mare
pe’ chelle ppene amare
che mò me stanno a da’!

Me ne vogl’ì luntano
‘a tutta chesta ggente
che sape sulamente
‘e spalle murmurià!

Titolo: Ij sto prianno a Te
Data Inserimento: 13/7/2023 alle ore : 13:2

‘Inte a ‘sta stanza mia fredda e scura
‘addò ce trase nu felillo ‘e luce,
de llastre e chesta mezza fenestrella
ij stò prianno a Te, Ddio mij buono.
Te sto cercanno comme a tutt’ ‘e juorne
pe’ dinte a ‘sti penziere appecuntruse
pe’ te ringrazzià pe’ tanto ammore
ca ij me sento ‘ncuollo ogni mumento
pe’ tutto chesto bbene ca me Vuò!
‘Ncantato ‘uardo ‘stu zechillo ‘e luce
ca doce, doce me cummoglia ‘a faccia
sentenne ca si Tu ca mò m’abbaglie.
Nu sciuscio ‘e viento arape ‘sta fenesta
e all’improvviso vèco mmiezzo ‘o cielo
‘na stella ca llà, primmo, nun ce steve.
…Acàlo ‘a capa ‘n terra e penzo allora
…‘stu segno che haggio avuto, so’ sicuro,
le dato Tu che ‘a cielo me saluti.

Titolo: Diciott’anne
Data Inserimento: 13/7/2023 alle ore : 13:0

(A mio figlio)

Comme se vede ca ‘stu tiempo vola
e nun te da ‘n istante pe’ penzà,
…se iesco a ffine ‘e quanno tu nasciste
gia sto parlanne ‘e diciottenne fa!

Io m’arricordo tutto, ogni minuto,
‘e quanno ognuno steva a t’aspettà,
…s’era già fatto scuro chillo juorno…
quanne ‘stu core steve a scalpità.

Vediette ‘a primma vòta ‘st’uocchie tuoije
e nun me riusceva ‘e raggiunà;
…tu stritto ‘mbraccio ca chiagnive forte
e’ ij ca tremmavo da’ felicità.

Mentre tu criscive ij te ‘uardavo
quanno a gattoni stive a cammenà;
…m’arrecreavo quanno sulo, sulo
cercave a tutta forza ‘e t’aizzà.

Ij tengo a’ mmente quanno dinte ‘a scola
tu senza ‘e nuje nun vulive stà,
…avimme fatte ‘e tuoste tutte quante
ma chisto core nuoste steve llà…

Ij m’allicordo ‘e quanno ‘a primma vota
a scola te facetteno ‘mparà,
sturnata, a cantilena, tutta quanta,
‘a poesia ‘a festa del papà.

Cu ‘na vucella che t’asceva a stiento
- ma quanto sive bello a recità -
Ognuno ‘e nuje te senteve appena
ma ce pareva ca stive a cantà.

Quanne accataje ‘a primma bricichetta
tu subbeto faciste a t’ha ‘mparà.
Po’ t’arricuorde ‘o primmo motorino?
Che cumbinaste nun se po’ cuntà!

Mo’ te se fatto gruosso, quase n’ommo,
e t’he ‘mparato pure a raggiunà…
Da ogge chesta vita toja è cagnata
…mò si trasuto ‘inte a maggiore età.

Tutto se cagne quanno po’ se cresce;
pure ‘e bisogne tuoje stanne a cagnà,
ma chello che è certo, sta famiglia…,
fa sempe ‘e tutto pe’ t’accuntentà!