POESIE

Titolo: L’arco da ‘Nunziata
Data Inserimento: 17/7/2023 alle ore : 12:24

Pe’ sotto a ‘st’arco ij ce cammino spisso,
ma nunn me stanco maje do ‘uardà!
…Me pare ‘e riturnà ‘inte‘e tiempe antiche,
quanno ce vaco sotto a passià.

Ce passo e spasso e po’ guard’ ‘o lilorge,
…‘o fisso e po’ me metto a suspirà;
ritorno cu ‘e penziere int’ ‘o passato
e chiano, chiano torno a cammenà.

Io quanno passo… ce resto ‘ncantato,
…me pàre comme stesse a me parlà…;
co’chella “vesta” fatta ‘e lampadìne
se passo ‘a sèra me fa ‘nnammurà!

Ij cchiù m’ ‘o ‘uardo e cchiù me vène a mmente
chist’arco ccà che vvò significà!
che dè p’Averza chisto monumento,
nisciune ‘e nuje s’ ‘o ppò maje scurdà!

N’’a visto ‘uerre…, …n’ ha subbìto ‘e botte…
Ognuno ce ‘o venève a bumbardà…!
Sarrà pe’ gelusia o pe’ dispietto,
…‘o vulevano pe’ fforza scarrupà!

Ma manco ‘o cchù nnemico ce ‘a pututo…,
e guaje, mo, chi vène a ce ‘o tuccà!
Chist’arco da ‘Nunziata è ‘nu tesoro
ca sùlo Averza ce putèva stà!

Titolo: ‘O parente
Data Inserimento: 17/7/2023 alle ore : 12:23

‘E chisto ca ve parlo è ‘nu parente
che s’accattatto quatto appartamente,
…ve dico ca me pare ‘nu pezzente,
…me pare ca nun tène maje niente
e se ‘o vedite chiagne sulamente.

Me pare miezzo fesso ‘stu parente
ma chello ca è sicuro, certamente…,
che chisto invece è molto intelliggente,
…de’ fatte suoje nun fa sapè niente
e chiagne sulo pe’ ghì ‘n culo a’ ggente!

Titolo: “Suricillo”
Data Inserimento: 17/7/2023 alle ore : 12:22

È chiammato ‘o “Suricillo”,
…pare ‘o guappo do quartiere
…è ‘nu metro e’ nu zichillo
ma se vò fa rispettà!

Vò stà annanze a tutte quante,
…nun se vo fa surpassa…
…tene ‘a posa ‘e ‘nu ggigante
e vulesse cumannà!

L’ata sera ‘inte ‘o rione
alluccava comm’ a ppazzo,
…me pareva ‘nu lione
…se mettette a sbraità!

Songo ‘o meglio! (isso dicèva)
…vuje m’avite rispettà!
Ma ‘na voce rispunneva:
“Suricì” vatte a cuccà.!

S’avutaje annanze e ‘a rèto
pe’ ccercà chi ‘o sfutteva.
…‘O ssapite ca ij “fèto!”
…stongo pronto a ve sfidà!

Se ve ‘ncoccio, embè, v’’o ggiuro,
io ve lascio immagginà…!
Ve ‘ncatasto ‘n faccia ‘o muro
…v’aggia fa’ furnì è campà!

S’ ‘a cantava comme ‘o guappo:
…“Se nun triemme viene ccà!!”
…Ma addò vaje: Si ‘nu “tappo!!”
…se sentette d’alluccà.

‘E pernacchie ‘stu “Cardillo”
ne pigliaje ‘n quantita;
da paura, “Suricillo”,
…stette pronto pe’ scappà.

Titolo: Muzzarella
Data Inserimento: 14/7/2023 alle ore : 10:46

Ij v' 'o ggiuro è sempe 'a stessa…,
'a cunosco 'a quanno è nnata…,
…tène ancora 'a vocca 'e latte…
…chella 'o vero n' è cagnata!

È d'Averza e tutt' 'a sanno
stà bellezza ca stà ccà!
'A cunosce tutt' ‘o munno
…s’è saputo fa’ nutà.

Porta sempe 'a vesta ianca
pecchè è pùra e 'i qualità…!
…È “prutetta” ‘a tutte quante…
…guaje a chi ce 'a va a tuccà!

Lasse m'occa ‘nu prufummo
a chi prova a se 'a “vasà”,
e chi 'a prova po' ce resta…
…maije cchiù se fa lassà!

È tunnella e’ piccerella
ma se sape fa apprezzà!
Ma se 'a vuò cchiù grussicella…
…pure 'e ttrezze te pò dà!

Mo s'è fatta assaje cchiù bbella…
…tene 'o “D.O.P.” 'e qualità!
Essa è bbona... muzzarella,
e se vò fa’ rispettà!

Titolo: Facite ‘a carità!
Data Inserimento: 14/7/2023 alle ore : 10:45

Mentre ‘a jere jevo ‘n cammino
haggio visto ‘nu cecato
che sunava ‘o viulino
fòre a’Cchiesa addunucchiato.

Era ‘o vero ‘nu splennore
chella musica affatata;
…jeve ‘nfino a ‘n funne ‘o core…,
…tutte ‘a ggente era ‘ncantata.

‘Nzieme a isso, llà vvicino,
‘na nennella ca priàva
e guardanne ‘o piattino
ogni ttanto ce chiammava.

Era ‘o vero cummuvente
chella scena appriparata
e penzaje sulamente:
…Hadda essere aiutata.

Llà vvicino… ‘nu fuglietto
ca cercava pietà:
“Cio che date e ben accetto!
…Fate un po’ di carità”!

Cu ‘nu zumpo me ‘nfezzaje,
‘mmiezzo a tutta chella ggente,
e ‘ntrasatte sucutaje
chi ‘uardava sulamente.

Le dicietto a ‘stu cecato:
Comme faccio a t’aiutà?
…Se he ‘a essere operato
dimme tu ca pozzo fa!

Ma chiagnenne s’avvicina
e me conta ‘a verità:
“…Stà criatura nun cammina!
…N’è pe’ mme ca stongo ccà”!