POESIE

Titolo: E chi se spòsa
Data Inserimento: 13/7/2023 alle ore : 12:59

(a mia sorella)

Hammo fatto ‘nu prugetto…
…nunn è ccosa ‘e ce spusà!
…Stamme ‘nzieme con affetto,
…a spusà chi ce ‘o fa fa!

Stamme ‘o vero troppo bell’
…me parimme duje pascià,
…hamma fa ciuri e ciurell’…
…hammo voglia ‘e sfezià!

Ma ‘intrasatto ‘nu “pallone”
…stà coccosa ca nun và!
Ccà è asciuto nu ‘uaglione
che è venùto a ce abbraccià.

Mò ‘sta vòta simme a ttre
e ‘sta cosa s’adda fa!
Patty mò cunziglia Andrè:
“Ce cunviene ‘e ce spusà”!

È fernuta ‘a zezzenella
chisto ccà stà a cumannà,
…primma pure s’heva bell’…
ma ringrazzio… ca ce stà.

È trasuto all’intrasatte
senza manco ce avvisà
ma inte ‘o core che ce ha fatto
…nun putite immagginà!

Primma stèva tanta pace…,
mò magari nun ce stà,
ma mo si ca ce piace,
mo ce stà… felicità!

Titolo: ‘O spaccone
Data Inserimento: 13/7/2023 alle ore : 12:58

Si ‘nu spaccone dice tiene ‘e sorde
e te ne vanta sempe, ogni minuto,
…‘o ddice sempe nnanze a tutte quante
…ormaje ognuno mò t’ha cunusciuto.

Ognuno ormaje s’a ‘mparato ‘o fatto…
e a ‘stu difetto se ne fa resate,
te sfotte quanno miette mano a’ sacca
e caccia fòre sorde ‘utt’ ammappate.

So’ diventate comme ‘o nire fumme
‘sti sorde tuoje a forza de caccià.
…So’ sempe ‘e stesse nunn te spenne maje…
ma faje sulo ‘a mossa e ce pavà.

Haggio penzato allora a nu rimedio
mo na curnice te facimme fa…
e appena jesce ‘o quadro de fujente
pe’ mmiezzo a festa te faccio girà.

Ormaje è diventata nu taluorno
‘sta spaccunata ca faje che cumpagne!
…Vaje dicenne ca staje chino ‘e sorde,
…ormaje ccà pe’ tutti si ‘na lagna!

Ma forse nunn ‘o saje ‘o ditto antico…
ca nun so’ ‘e sorde ca fanno felice.
Te siente gruosso ma nunn si nisciuno
e chesto te ‘o ddico ij… ca simme amice.

Titolo: Haggio vista ‘na cuiete
Data Inserimento: 13/7/2023 alle ore : 12:56

Haggio visto ‘na cuiete
verso ‘e nnove stammatina
…‘nu silenzio, quanta pace…
…nun sentevo d’alluccà.

Tutt’attuorno troppa calma
…nun sentevo ‘e sbanià,
…m’haggio chiesto: Che succieso?
Ma che dè…? Ma che sarrà...?

‘Nfino a’ iere se senteva
‘nu casino esagerato,
…s’alluccava a tutta forza…
…me pareva ‘nu mercato.

Mo invece so’ trasuto…
…che silenzio ca ce stà…!
nun se sente ‘na parola…
…nun se sente ‘e riciatà!

Se stà ‘o vero troppo bbello…,
…nun se parla do pallone,
…nun s’allucca comm’a pazze…
…nun se sente ‘nu rummone.

Stù silenzio è troppo strano!
È ‘na cosa ‘a stravedè…,
…se stà troppo ‘ngrazia ‘e Dio
…m’haggio chiesto: Ma pecchè…?

Nun ce stà chi fa mmuina.
Nun se sente ‘e rraggiunà…
…Nun se parla cchiù ‘e niente.
…Nun se sente d’alluccà.

Po’ i m’haggio arricurdato…,
ccà nisciuno mò ce stà…
…ogge è festa …stanno a’ casa!
…era ‘stu mutivo ccà.

Ma pareva troppo bbello…
ma assaje nun durarrà…,
…mò dimane s’accummence
‘n ata vota a sbraità…

Titolo: ‘A mmericina mij è ‘a famiglia
Data Inserimento: 13/7/2023 alle ore : 12:54

Ij mò ve voglio dì chello ca faccio
quanno ij ‘e vvota nunn me sento bbuono;
…nun piglio mmericine ne mmiscuglie
ma saccio bbuono comme me curà.

Me vàso azzicco, azzicco ‘a sposa mia;
se po’ manco me passa ‘a malatia
m’abbraccio forte, forte pure ‘e figlie
e ammesco mmiezzo pure ‘e nnore mij.

Se fosse poco ancora…, allora piglio
e me stregno forte assaje a papà mio.
‘Nu vàso po’ me piglio ‘a ‘nu nepote
e po’ m’abbraccio pure a mammà mia.

‘A mmericina mia è ‘sta famiglia
pecchè vicino a loro a mè me passa…
…pecchè vicino a loro ogni malanno
nun po fa’ niente nun ce po trasì…

‘A mmericina mia è ‘o bbene lloro
pecchè vicino a loro ‘o mmale passa!
Pecchè è sicuro… è ‘na certezza ‘e Ddio…
che ‘o mmale ‘nzieme ‘o bbene nun po ghì!

Titolo: ‘Na festa triste
Data Inserimento: 13/7/2023 alle ore : 12:52

(per mia cognata Teresa)

Mò che festigge triste e scunzulata,
co’ chi ‘a vuluto, almeno pe’ ‘na vota,
farte truvà ‘sta festa appriparata
…hanno vuluto, pe’ ‘na vota sola,
farte scurdà ‘o brutto do passato,
ha ddo’ ‘e suppurtato ‘e ppene amare
e quanno ‘o vero ammore “se ne ghiuto”.
…Te vonno fa’ scurdà chilli penziere,
quanno te le strignuto ‘mbietto ‘e figlie tuoje
e co’ curaggio ‘e chi po’ resta sola
s’ha dato ‘a forza ‘e putè “cammenà”.
Mò sta pe’ tte ‘sta festa appriparata
‘e chi ccà t’ha vuluto sempe bbene
e aspetta ‘a te sultanto ‘nu surriso
che ‘a tanto tiempo nun ce fatto cchiù.