POESIE

Titolo: Duetto: ‘A ppicceca co’ ‘a gnòra
Data Inserimento: 17/7/2023 alle ore : 13:9

'A gnòra:
Si nnato cu a cammisa!
Si n’ommo affurtunato!
Si chesta t’ha lassato
…tu le ’a ringrazià!
'A nòra:
È nnato co’ ‘a cammisa?
È stato affurtunato!?
Ma se l’haggio lassato
…pe’ fforza l’heve ‘a fa’!
'A gnòra:
Co’chiste “chiaro ‘e luna”
‘n ato ommo aggraziato,
mò ca t’ha abbanunato,
…‘addò se ‘o va piglià!
'A nòra:
Ma che state ricenno?
È ‘n ommo aggraziato?
Ma forse disgraziato?
È chesta a verità!!
'A gnòra:
Si bello comm’’o sole!
E sempe faticato!
Maje niente l’è mancato!
…Ma chi ce ‘ha fatto fa’!
'A nòra:
Si è bello, …nun c’è male!
E se ‘a faticato…
‘sti sorde s’ha iucato!
…Nunn l’ha purtate ccà!
'A gnòra:
Teneva ‘nu tesoro
‘sta piezza e scellerata
…‘a fatta sta cacciata
…ma po’ se pentarrà!
'A nòra:
Tenevo ‘nu tesoro?
Dicite haggio sbagliato?
Ma ij dico: haggio ‘ngarrato
‘sta vota a do lassà!
'A gnòra:
Mo’ quanne ‘a vide scanzala!
Se pure ve ‘ncuntrate,
l’uno difronte a’ ‘n ate,
…fa’ ‘mmente ‘e ‘n ‘a ‘uardà!
'A nòra:
Se pure ce ‘ncuntramme,
l’uno difronte a’ ‘n’ato,
songh’io che a ‘stu ‘nguacchiato
nunn ‘o donch’ a parlà!
'A gnòra:
N’ ‘a vire che è assai ‘mpicciosa!
Nun t’ha maije rispettato!
‘E te maje s’è ‘mpurtata!
…Te stev’ a cumannà!
'A nòra:
Dicite so’ ‘mpicciosa!?
…nunn l’haggio rispettato
‘stu ruoccolo spegato!?
…Ma ij ch’avevo ‘a fa’?
'A gnòra:
‘O ssaccio, …tu ‘a vuò bbene!
Però…, che t’ha lassato,
…si stato affurtunato!
…‘Uagliò, bello ‘e mammà!
'A nòra:
Se o vero me vò bbene
nunn l’ha mai dimustrato;
e se nunn m’ha cercato
…vò bbene cchiù a mmammà!

Titolo: 'A mamma
Data Inserimento: 17/7/2023 alle ore : 13:8

'A quanno 'o munno è munno è risaputo
…è sott'inteso, …è legge, …è testamiento.
Quanno se parla 'e mamma è “scritto 'n cielo...”
ognuno se 'a difende cchiù da vita.

Ognuno che se 'a sente 'e nummenà
fa cos'è pazzo, t'arrevota 'o cielo,
pe' 'na parola ditta contro a essa
...fosse capace 'e fa' 'na fessarìa!

'A quanno 'o munno è munno è accussi...!
'O bbene 'e mamma nun tene cunfronte,
…te tiene 'o mmale fatto 'a tanta ggente
ma a mamma è mamma …nun ce l'he tuccà!

Chi stà luntano 'a essa se dispera!
…Se porta appriesso dinte 'o portafoglio
ritratte e cemmeraglie pe' ricordo
e 'o bbene azzeffunnato dinte 'o core!

Pe' cchi po' nunn 'a tène ... nun ve 'o ddico...!
..P'ammore 'e Ddio chisto è sacrileggio!
…Squartalo pure, …fallo piezzo, piezzo,
ma te cunviene 'e nunn’ annummenà!

Pe’ tutt’ ‘e figlie ‘a mamma è ‘nu tesoro!
Chesto è sicuro… comm’ è certo Ddio!
Ma ij credo ca nun s’è truvato ancora
cchiù 'e comme voglio bbene a mamma mia!

Titolo: 'A carcioffola arrustuta
Data Inserimento: 17/7/2023 alle ore : 13:7

‘E carcioffole arrustute
nun ce ffanno cchiù magnà!
…Fatte ‘ncopp’ a’furnacella
mun se ponno cucenà!

Dinte ‘e parche è pruibito!
Mmiezzo a via nun se pô stà!
…Votta fummo, m’hanno ditto!
…Ij nun saccio ch’ haggio ‘a fa!

Hanno miso ‘nu divieto
‘n faccio ‘o mùro ‘a parte ‘e llà…
…Ce hanno scritto, chiaramente:
“Nun ce avite affummecà!”.

Ma ‘sta ggente nun capisce
che ‘stu fummo ca ce stà
è l’addora ‘e tiempe antiche,
è ‘o prufummo ‘e ‘sta città!

E’ allora nu rimmedio
io pe’ fforza haggia truva:
Sulo sotto ‘o fucularo
l’haggio ‘a fa’… pe’ me magnà!

Titolo: Ll'onna
Data Inserimento: 17/7/2023 alle ore : 13:4

‘O vvi’ che t’annascunne inutilmente?
Ij t’haggio visto pure ‘a dinte ‘o scuro!
Cu chesta “capa riccia” tutta ianca
…‘sta luna t’ha riflesso… staje sicura!

Iammo se ‘e ‘a venì muovete ‘a ‘mpressa
che nun me firo cchiù ‘e t’aspettà…!
…Chello che a da succedere succede!
…Nun vide ca me stongo ‘a rassignà?

Fatte ‘stu zumpo… iamme curre forte!
Caccia ‘a putenza! …Curre ‘n faccia ‘a sponna!
…Vieneme ‘n faccia …scassa tutt’ cosa!!
- Forte alluccava ‘a nave ‘n faccia ‘a l’onna –

Tanto nun è a me che faje paura!
Se vaco ‘n funno a me nun me ne ‘mporta!
‘O mmale ‘o faje a chesti criature
che pe’ capricce tuoje… rischiano ‘a morte!

Titolo: M'he lassato
Data Inserimento: 17/7/2023 alle ore : 13:3

Che me strignive a fa’!?
Che me vasàve a fa’!?
Se doppe tanto ammore,
te si scurdato ‘e me!
…’E quanno m’astrignive,
e ij pure t’astrignevo
co’ ll’ucchie ca parlavano
chine ‘e felicità!

T’annammuraste ‘e me?
Ja dimme ‘a verità!
Pecchè tu me lassato?
…Voglio sapè pecchè!?
M’annamuraje ‘e te,
ma a mme nun so’ bbucie!
Si ttu ca me lassato,
ma nun me scordo ‘e te!

Ca te spugliave a fa’!?
Che m’abbracciave a fa’!?
Se doppe tant’ammore
nun pienze cchiù a me!
Te voglio ancora bbene!
…‘O ssaje ce penzo ancora…,
a quanno tutt’ ‘e duje
ce hammo giurato ammore.

Pecchè tu m’he lassato!
Haggio bbisogno ‘e te!
Ij stò suffrenno assaje?
…è chesta ‘a verità!
Haggio ggiurato a Ddio
ca se tu nun turnave…,
pecche ne soffro assaje,
ij mò voglio murì!