POESIE

Titolo: Lacrime ‘e gioia
Data Inserimento: 13/7/2023 alle ore : 13:13

Appena ca l'he visto, appena è nnato
te l'he strignuto forte… a stritto, a stritto
e te rignùto 'e ggioia, certamente!
'O còre t'è sbattuto forte 'mpietto
quanno 'e 'sti vàse ce ne rate a mille
a ‘stu “murzillo” ‘e ommo piccirillo.
Ma chesto nun è niente, è fessarìa,
'n cunfronto a quanno venarrà vicino
e senza nu mutivo, senza niente,
- comme te fanno st'anime 'nnucente -
t'abbraccia forte e te fa 'na carezza.
…Se squaglia tutt’ 'o sanghe 'a dinte 'e vvene
e chiagnere te fa pe’ tanta gioia
pecchè so’ tutte lacrime 'e 'stu bbene
ca esceno do còre lentamente.

Titolo: ‘O nepòte
Data Inserimento: 13/7/2023 alle ore : 13:12

Ognuno ce 'o ddiceva...
Ognuno 'o raccuntava...
Ognuno ne parlava
'e chello che pruvava...

Dicevano 'utte quante:
" 'E figlie te so' figlie”
ma annanze a' 'nu nepote
te "sciuoglie" sane, sane.

È stato tutt' 'o vero!
ognuno ce ha 'ngarrato!
...'O vero ha 'nduvinàto
chello ch'hammo pruvato!

Dicite bbuono vuje…
‘sta ggioia m’ha cagnato…
…Ij comm’ appena ‘o veco
me sento “ ‘mpapucchiato”.

Mo niente è comm' a primma…;
...me sento furtunato,
ij songo ‘o cchiù felice
'a quanno chisto è nnato.

Ij già me so’ squagliato
pe' mmezzo 'e tanta ggioia,
...ve saccio sulo dicere…
‘stu còre s’ha rrubbato!

Titolo: 'O Sacramento do Battesimo
Data Inserimento: 13/7/2023 alle ore : 13:11

'Uarda Gesù...,
…guarda ‘stu criaturo
che ccà sta a fa' pe' Te 'stu Sacramento!
Affacciate 'nu poco 'a dinte 'o cielo;
…arape 'sta fenesta 'n Paraviso!
Dacce 'nu sguardo a chisto figlio tuojo;
…facce capì pe' nu mumento sulo
che zitto, zitto senza fa' rummore
ce staje vicino, … ccà, vicino a nuje!
'Uardalo ‘n faccia a chisto figlio Tuojo
che cerca 'e cancella cose sbagliate…,
comme Tu ce 'nzignato ch’ hammo ‘a fa’.
Chi sta ccà ddinte… 'o vvì ne fa tesoro...
…te ‘o stamme vattianne appena nato
pe' accummincià accussi tutt' do capo!
'Uarda Gesù...,
…guarda ‘stu criaturo
che t’hammo “cunzignato” appena nato
…dacce ‘nu sguardo nunn ‘o lassà sulo
…fancill’ ‘o cammenà senza peccato!

Titolo: Cennere d’ammore
Data Inserimento: 13/7/2023 alle ore : 13:10

‘A troppo tiempo oj ne me ‘bbandonato
e comme ‘nu vraciero cunzumato
tutto ‘sto ffuoco ‘mbietto s’è stutato,
e ‘na vrangata ‘e cennere ‘e truvato!

Quanno isso me bruciava nunn ce stive!
Chesta vampata ‘e “fuoco n’ ‘a vedive!
Ma quanne si turnata po’ vulive
che chillo ffuoco ardente tu avive.

Aje voglia do ppiccià cu vase ardente!
È inutile ca “sciusce” inutilmente!
‘O vvì ca pierde tiempo sulamente!
…È troppo tarde nun può fa’ cchiù niente!

Pe’ tutt’ ‘o tiempo che nun ce si stata,
e chesta lampa, sola, le lassata,
ce haggio truvata ‘n ata ‘nnammurata
che… a chisto ffuoco ardente s’è “scarfata”!

Titolo: M'haggio 'a fa' ricoverà
Data Inserimento: 13/7/2023 alle ore : 13:9

Stongo ccà ‘ncoppe ‘o ‘spitale…
…quanta pace che ce sta!
Quanta ggente che sta male
ma nisciuno… a sbraità.

Nun se sente ‘nu muschillo,
dinte a ll’aria, ‘e passià,
…sento, appena, ‘nu zechillo
‘nu ‘nfermiero ‘e cammenà.

Quanto invece sto cu ttico
nun riesco a repusà!
M’addimanno allora e dico:
Forse è meglio ca sto cca!?

Siente… allora haggio penzato
nu rimmedio pe’ restà:
…Faccio finta ‘e fa’ ‘o malato
…m'haggio ‘a fa’ ricoverà!